tg-me.com/Fadfadah98/9590
Last Update:
قالت :
طَلَعت من إمتحاني ما لقيت مواصلات ، و حبّيت أقعُد مع صحبتي المُقَرّبة شوية 🌸
أخوها جا ساقها لأنه والدتها كانت تعبانة ، ما رِضَت تخلّيني
لكن حاولت أطمّنها إنه حاركب المواصلات طوالي .
ف مشت بعد إلحاح مني ،
بعد داك وقفت براي مُنتَظرة أي عربية تجي و كنت
واقفة خايفة شديد ..
بعد حوالي عشر دقايق وصَلَت عربية هايس ، وما فيها
غير السوّاق !
قَعَد يعاين لَي عشان أركب ، رجَعَت لي ورا بخطوات خوف
وقلق ، كنت متردّدة وما حابّة أركَب .
لقيته نزل من العربية وبدأ يقرّب ناحيتي ، خُفت و قرّبت أجري لكن كان جوّاي حاجة مُطمّناني ، قعدت اقرأ قرآن في سِرّي لحدي ما الراجل وقف قدامي
وقال لي :
" خليكي واقفة لحدي ما العربية تتمَلي وبعد داك اركبي يابتي " ♡
عاينت بنظرة سريعة لقيته وقف على جنبة
وطلَّع موبايله من جيبه
وبدأ يتكلم ويقول :
" حقِّك عَلَي شوية و أجيك والله "..
و بعد داك عاين لي وابتسم
وقال لي :
" معليش المدام مُنتَظراني " ♥️
هزّيت راسي وسكتت ، لقيته بردّد كلام في سِرّه
لكن ما عارفة شنو !
دقيقتين بالضبط والركاب ركبوا كلهم
ما كان في مكان غير كرسي جنب السواق ف ركبت ، و خَلّى كرسي بيناتنا فاضي ..
وبعدين شغَّل سورة يوسف
بصوت مشاري العفاسي ، لقيت روحي رديت ليهُ
بكل تلقائية :
" فاضِل نفر كده صح؟ "
ابتسم وقال :
" لا ده محجوز لزوجتي " ♥️
الركاب رسّلوا القروش فقال لي :
طلِّعي منها مبلغ مُعَين
و جيبي الباقي ، وبعد داك شال المبلغ ونزل أشترى حلاوة
وزّعها على ناس العربية
وقال ليهم :
"أدعوا لزوجتي عندها مؤتمر مهم الليلة"
واحد من الركاب قال ليهُ :
" مؤتمر شنو ياحاج ؟! "
فضحك وقال :
" عُقبال أولادك ، زوجتي دكتورة أسنان " ♡
ضحكت وقلت ليهُ :
" كيف يعني؟ "
خفض صوت القرآن شوية
وقال ب لمعة واضحة جداً في عيونه :
" ركبَت معاي مرة وكان عندها أمتحان في آخر سنة وكنت ملاحظ عليها التوتر ، ف نزلت اشتريت حلاوة و ذكّرتها بسيدنا يونس وإنه ربنا نجَّاهُ في أكتر وقت كان خايف فيهُ "
وبعدين وصّيتها تقول :
" اللهم كما ألَنت الحديد لنبيَّك داؤود سهِّل لي كل صعب
ويسِّر عسراتي "
ضحكَت هي والدنيا ضحكت لَي من الوقت داك 🌸
وطلَعت من الإمتحان مبسوطة
كنت دايمًا بقول مستحيل تتزوَّجني ، دي دكتورة وأنا يادوب سوّاق ، بس ما كان ذنبي إنه أبوي يتوفى ويخلّي لَي زواج اخواتي البنات ! "
يوم حفلة تخرُّجها
اتوكَّلت على الله واتقدَّمت ليها ، أهلها رفضوني
بس هي وافَقَت بَي
كنت بحاول أكون جدير بثقتها فيني ، لمّن جات تفتح عيادة
بِعت عربيتي
و ساندتها و لمن ربنا فتحها عليها جابَت لَي غيرها "
ناس العربية كلهم بِقوا يقولوا :
" يابختها بيك والله "
رد بهدوء وقال :
" بالعكس !
هي كانت ممكن تتزوج أحسن مني ب كتير
ومع ذلك ولا مرة ما حسّستني بالفرق بيناتنا ، كانت بتقعُد
صاحية لحدي ما أرجع من برة ،
وقبل ما تنزل للعيادة الصباح بتعمل لَي فطوري " ..
بعد داك وقف قدام مبنى
ونزل طبطَب على كتف زوجته اللي كان واضِح عليها
مظهر العِز والشياكة ، وجابها ركَّبها جنبي
في الحقيقة إنه وسط القصص والزواجات الفاشلة
اللي بنشوفها دي ، لازم تختار راحتك النفسية قبل ما تختار القروش ..
في الوقت ده
اتذكّرت جارتنا اللي متزوجة دكتور ولابسة دهب بالكوم في أصابعها ويديها ، و بعد ده كله ملامحها باهتة طول الوقت ودايماً بتقول لي الزواج جاف وما فيهُ حِنيّة !
ما تتزوجوا
الشخص المناسب ، اتزوجوا الشخص الصاح ♡
وخليكُم عارفين إنه :
التضحية بتفرِق !
#بيوت_متطمنة
فاللهمّ بقدر صِدق النوايا اجعل الخِتام حمداً و رِضا ، ألا يُصيب الندم القلوب بعد القبول ، و جازِ الصبر بالفرح الوفير ..
ممكن نصلّ على الحبيب !
#تيسير_الصادق